लिंगायत महिलांनी व्यवसायाच्या बाबतीत स्वावलंबी व्हावे - काकासाहेब कोयटे , सातारा येथे बसव पुरस्कार वितरण
सातारा दि 23 :- प्रतिनिधी म.बसवेश्वर सामाजिक सेवा मंडळ, सातारा यांच्या वतीने नुकताच बसव भूषण पुरस्कार वितरण सोहळा सातारा येथे पार पडला.
त्यामध्ये महाराष्ट्र राज्य पतसंस्था फेडरेशन चे अध्यक्ष मा.ओमप्रकाश तथा काकासाहेब कोयटे हे प्रमुख पाहुणे म्हणून बोलत होते.
ते म्हणाले की,एक पुरुष शिकला तर तो शिक्षित होतो.पण एक स्त्री शिकली तर पुढची संपूर्ण पिढी शिक्षित होते.त्या प्रमाणे आपल्या लिंगायत समाजातील महिलांनी पण व्यवसायाच्या बाबतीत प्रगत आधुनिक ज्ञान घेवून स्वावलंबी होण्याच्या बाबतीत मागे राहू नये.त्यासाठी येत्या 10 मार्च ला तुळजापुर येथे व्यवसाय करण्यास लागणाऱ्या छोट्या मशिनरीचे प्रदर्शन भरविण्यात येणार आहे.तसेच व्यवसाय करायला लागणाऱ्या कर्जासाठी आपल्या समाजातील बँका व पतसंस्था सहकार्य करणार आहेत.
त्यासाठी महिलांनी तुळजापूर येथे येवून सर्व मशिनरी व त्यांना पतपुरवठा करणाऱ्या संस्थांची माहिती घेवून व आर्थिक दृष्ट्या सक्षम होऊन सदर व्यावसायिक प्रदर्शनाचा लाभ उठवला पाहिजे .
तसेच समाजाच्या भल्यासाठी सर्व स्त्री - पुरुषांनी समाजकार्यात हिरीरीने सहभागी होणे आवश्यक आहे.
यावेळी मा.प्रकाश शेठ गवळी,राजेंद्र घुटे, प्रदिप बापू वाले,नानासाहेब मेनकुदळे,मंडळाचे संस्थापक सागर शेठ कस्तुरे,नंदकुमार ( नंदूशेठ ) गुरसाळे,श्रीनिवास कामळे,सिद्धराज शेटे यांची प्रमुख उपस्थिती होती.
या प्रसंगी मा.भारतशेठ बारवडे यांना समाज भूषण, मा.दिलीप पिलके यांना सहकार भूषण , मा.राजेंद्र आटकेकर यांना उद्योग भूषण , मा.राजेंद्र लोखंडे यांनी कृषी भूषण व मा.महालिंग मेनकुदळे यांना साहित्य भूषण पुरस्कार प्रदान करून विशेष सन्मानित करण्यात आले.रविवार दि.18 रोजी सायंकाळी 4 ते 7 या वेळेत हा कार्यक्रम पार पडला.
कार्यक्रमाचे प्रास्ताविक व स्वागत माधव मेंडीगेरी व आभार प्रदर्शन निर्मलाताई बारवडे यांनी केले.कार्यक्रमाला विविध क्षेत्रातील मान्यवर व समाज बांधव उपस्थित होते.
